وبعدين مع حب النت !!!

مدخل..!

طبعا بعد ماستفحلت القضيه قررت اكتب هالموضع من قهر من حزن والله

وعن تجربه سمعتها من صديقاتي.. وحتى شلتي اتوقع صار لهم خبره من كثر هالموضوع مايسمعنه من البنات..شفناه في سنين والعشق
والحين نشوفه بدمعه
الموضوع ماكتبته من عبث ..كتبته من قلب ..كتبته لااني آتمنى الخير لكل من آعزه..

حب متهور حب جنوني حب فاضح
بين اعضاء وعضوات

وصار لايخلو منتدى من ذا السوالف..
ماخذو النت على انه تسليه من يوم متعب..
ولا أخذوه ضحك بعد هموم الحياه والتفريغ
ولا آخذوه استفاده من اسئلة اختبارات وبحوث جامعه
أخذوه..
حب ورمنسيه وخرابيط

انا بتكلم لان اعضاء وناس يعزون علي شفت نهايتهم وسبه حب انترنتي فاشل ..

لييييييييييه وصلنا لذا المرحله
مشاعرنا مانتحكم فيها
ليه صار كل واحد يدور حب فاقده

أهلنا.. قصرو معنا في حبهم مو مبرر
أهلنا..ماعطونا حنان ولايسمعون لنا مو مبرر
امي.. تهاوشني ابوي يتلفض علي مو مبرر
أختي.. تكرهني اخوي يضربني مو مبرر
محد يهتم فيني..
ابوي مايعتبرني رجال.. مو مبرر

لاحد يلوم الأب بقسوته ولا الأم.. حنا في زمن ينخاف منه؟؟
امي وابوك يخافون علي وعليكم

ودهم يحمونا من كل شي يضرنا
بس مايعرفون كيف يوصلون مشاعرهم

انا ما انكر واقولها بالخط العريض..

كلنا فاقد حنان..

بس مو حل ابد اروح ادور حب في شات ولامنتدى ومسن

كم اعمارنا 17 ولا 18 ولا 20سنه

ترانا مو صغار مانعرف الصح من الغلط ولا نستنى احد يوجهنا ..

ولا لازم يصير عمرنا 40 عشان نميز ؟؟؟

جدتي نوره سالتها :قبل جدي كنتي تحبين آحد؟
<قلب وجهها آحمر قالت لاوالله غير جدك ماعرفت

وسآلتها كانوا البنآت قبل يحبون؟وكيف حبهن!

قالت:يابنت قبل لاعبيات ولاشي غير ملفع نلفه وعصابه
يمكن لارحنا الغدير يشوفنا آحد ويلمحنا .. ولا حنا البنات كان همنا من تخلص شغلها بسرعه
والي يلمحها يسال عن البنت وعن آهلها ويخطبها ثاني يوم
والي مايقدر على تكاليف الزواج وفقير
يقول فيها قصايد وشعر
لين ماحد يحسن عليه ويزوجه
^
^
^
الفائده انه حتى كلآم ماكلمها مع العلم كان يقدر!
و شافها مره وحده
مع انه يقدر يرجع ويشوفها؟

<اسلكم ليه ماكان يتجراء؟
...............
<فكرو فيها

ومع ذالك صان نفسه لين خطبها

هذا قبل ايام جدي وجدك..
والحين
؟؟؟؟؟؟؟

يتعرف عليها بمنتدى
عشان لون خط ولاصوره رمزيه
ثم رسايل خاصه
ثم مسن ليل مع نهار
ثم رسايل جوال
ثم يكلمها جوآل
ثم افتحي كام وماصار رجل غريب إلا صار حبيبها وكل شي حلال له..

وهو ماعرف آهلها لسه
ويقول بيجي يخطبها في يوم ما..

سؤال للبنت..
لو عرف ابوك الي وثق فيك انو تعرفين رجال من وراه وتحبينه وش تهقين بيسوي فيك؟!

سؤآل لرجال..
وش بيكون وجهك لو سالتك آختك ولاأخوك من وين جايبها ذي؟ولامن وين عرفتها؟
خلنا من خوانك وش ردت فعلك يوم آمك تكون مختاره لك بنت من جماعتك وانت براسك حبيبه!تهقى امك بترضى تزوجك بنت هي ماتعرفها ولا من منتدى بعد؟

حبايبي اسالو بعضكم

من طلع بنتيجه إيجابيه في حب بالنت؟!

اتحدى احد اذا طلع في شي.؟
تدورن وش يطلعون فيه..

فراق
مشاعر جافه
حزن
ذكرى مولمه
حياه مستقبليه متعبه

واصلا احصائيه مو كلام مني ولامنكم طلعت من المحكمه
ان نسبة نجاح الزواجات عبر النت1%
والباقي فنش طلاآآآآآآآآآآآآآآق

ليه نستهلك مشاعرنا وحبنا في مشروع فاشل
ليه الواحد لاتزوج وقبل كان يحب يكون انسان جاف
ليه البنت لاتزوجت وقبل كانت تحب تكون بعد جافه
لانهم بكل بساطه افرغو كل مشاعرهم واحاسيسهم خلاص صار رصيدهم صفر

طيب لنفرض..
انت حبيبت بنت في منتدى واضفتها مسن ......الخ
ثم القدر فرقكم او بالاصح ربي ما أراد..
ورحت انت في طريق وهي في طريق..
وتزوجت ماشاء الله عليك واكتشفت ان زوجتك تحب غيرك ومعها مسن؟!

لاتزعل
سبحان الله كيف تزعل وانت كنت تحب وحده ومضيفها معك.؟؟

والبنت بعد لاكتشفت زوجها معه وحده مسن ويكلمها
لاتزعل؟؟
سبحان الله ليه تزعل وهي كانت تسوي مثله؟!

ولاتقولين يخوني ويكلم بنات من وراي
انتي قبله خنتي اهلك وكلمتي

سبحآن الله ليه تزعلون؟؟
سبحآن الله ليه تزعلون؟؟
سبحآن الله ليه تزعلون؟؟

الحب في النت اتحدى اي احد منكم يقول انه حب صحيح
او بمعنى حب يليق بآهلك وجماعتك وقبيلتك..

وخلونا من هذا كله...خلونا من اهلنا...وخلونا من كلآم الناس

ربي وربك
الي خلقني وخلقك
يرضيه ذا الحب ولا لا؟

ليه الحب دايم في الدس محد يعرفه من البشر غير الحبيبين
لانهم يخافون من الناس؟؟
وعشان عارفين انهم غلط
ولافكرو باللي عارف سرهم..ولا خافو منه..

لانهم ماقدروه ولاحسو انه يراقبهم لان لو حسو مجرد احساس انه يشوفهم كان استحو على نفسهم ...

وتظنون شي مايرضى الله بيستمر..
كلنا نعرف الله يمهل ولا يهمل

ليه نصلح غلط اهلنا بغلط
ليه نعاقب انفسنا بضرر لنا

خل نفكر نصلح غلط اهلها بأخواننا
نحاول نسوي لخواننا الي قصرو فيه امي وامك
الي قصر فيه ابوي وابوك
الحب الي فيك عطه اختك عشان ماتروح دور حب
والبنت بعد تهتم ب أخوها
عشان يحس فيه احد معه
خواننا الي بالمتوسط ياحبهم لهذره اجلس اسمع له سو حالك منتبه له ولو بالك مو معه
أخوك اختك طلعهم فر فيهم نص فره ضحك وناس وقلوب اقرب لبعض

خلو قلوبكم مقطعه ربع لامك ربع لاخوانك ربع لصدقائك ربع لزوجتك ربع لعيالك ربع لخوالك ربع لعمامك
ربع لراعي البقاله
ربع لخدامه
ربع لجاركم ابو محمد
عشان لا قدر الله وراح احد ماتموت علينا^_^

......وفي نهاية موضعي......
وعشاني تعبت و الكيبورد راح فيها ..

ودي بس اي احد يحب حب نت يفكر بكلآمي
أذا لقى فيه الصدق يحل قضيته باقرب وقت
ويدعي ربه
{يارب سترت علي وانا اعصيك فلا تفضحني وقد تبت اليك}

واذا كان العكس
لله درك اكمل مسيرك وننتظر قصة مآساتك تحكيها لنا يوم..

ومحلله كل من نقل هالموضوع لغرض ان تعم الفائده بالعكس اتمنى اني خرجت بشي رائع
ولم اعد بخفي حنين..